(1852) Arrullos

link

Mio anxelin, fia del alma
ora! ora! duerme en paz,
que d'Asturias son falagos
los besinos de to má.

Palombina coronada
q' apigaza 'n ñeru rial
muchos cielos tenrá España
cuando sepias esnalar.
Hasta entos, lluz de mios gueyos,
rite, mialma, que to pá,
con lloreos y con flores
pabellones pa ti fai.

D'orbayaos clavellinos
ye tu boca, n' onde estan
pures miéles, que me lleven
á besáte sin cesar.
Q' á miós reynos algun dia
si por tuyos Dios los da
tu i-os miembres á la REINA
que yo quiero remembrar.

Dende'l cielo por ti baxen
serafinos en solaz.
y t'avienten con les ales,
y bendicen el papar;
Y con cigües encantaes
y ruxeros de coral
por llevate á recostinos
t'acaricien á cual mas.

Cuando crezas y gayarda
ya t'afaye's pa prestar
por amate les coraes
á cien Reyes pruirán:
Y si glories y conquistes
tu quisieres entamar,
baxo enseñes vitorioses
tus leones ruxiran.